كيف يشتغل الموقع؟

وش يعني «أنكي» في اسم الموقع؟

أنكي برنامج مراجعة مشهور عند طلاب الطب والصيدلة حول العالم، وكلمة «أنكي» يابانية معناها «أحفظ»، وطريقتها اسمها «التكرار المتباعد». أنكي تطبيق، والطريقة اسمها التكرار المتباعد. فكرته الأساسية إنك ما تراجع كل شي كل يوم: البطاقة اللي حفظتها تبعد، واللي غلطت فيها تقرب. فوقتك يروح على اللي لسّه ما رسخ.

موقعنا مبني على نفس الفكرة ونفس المحرّك، بس بدل ما تجهّز البطاقات بنفسك، أسئلة ملازمك جاهزة وبالعربي، وتشتغل من الجوال مباشرة.

ليش ما أحل الملزمة عادي وخلاص؟

لأن حل الملزمة مرة وحدة يقيس اللي تعرفه اليوم؛ اللي يبني الحفظ هو رجوع السؤال لك بعد يوم، وبعده بأسبوع، وبعده بشهر.

زي لمبة البنزين: ما تعبّي السيارة كل يوم، وما تنتظر لين تقف بك على الطريق. الموقع هو اللمبة — يضوّي لك على السؤال اللي قرب يطير من راسك، ويرجّعه لك قبلها.

ليش البطاقة ترجع بعد يوم، وبطاقة ثانية بعد ثلاثة أسابيع؟

لأن ذاكرتك للاثنتين مو نفسها. الموقع يحسب لكل بطاقة — لك أنت بالذات — متى بتوصل لحالة إنك على وشك تنساها، ويرجّعها لك قبلها بشوي.

البطاقة اللي جاوبتها صح من أول مرة وبثقة تبعد أكثر في كل مرة: يوم، ثم أربعة، ثم عشرة، ثم شهر. واللي تغلط فيها ترجع بسرعة وتبدأ من جديد. يعني وقتك كله يروح على اللي ما رسخ، مو على اللي حافظه من زمان.

المحرّك اسمه FSRS، وهو نفس المحرّك اللي يعتمد عليه محترفو أنكي حول العالم.

وش فايدة زر «كان تخمين»؟

هذا أهم زر في الموقع. لما تجاوب صح وأنت مخمّن، اضغطه — ساعتها الموقع يعرف إن هذي المعلومة ما رسخت، فيرجّع لك البطاقة أسرع بدل ما يعدّها محفوظة.

وهو كمان اللي يخلي نسبة التذكر عندك دقيقة بدل ما تكون تقدير عام.

ليش الخيارات ترتيبها يتغيّر؟

عشان ما تحفظ مكان الإجابة بدل المعلومة. الترتيب مخلوط لكل بطاقة، فما فيه «الصح دايمًا أ».

وش يصير لو تأخرت أيام وما فتحت الموقع؟

ما فيه عقوبة وما فيه شي ينحذف. البطاقات المستحقة تتجمّع وتنتظرك، وأول ما ترجع تلقاها كلها. وإذا تجمّع عليك كثير، ابدأ عادي — الترتيب مضبوط بحيث الأهم يجيك أول.

وش «هدف اليوم» في الرئيسية؟

كل البطاقات المستحقة عليك اليوم في كل مقرراتك، وكم خلصت منها. لما يوصل للنهاية يخضرّ ويقول لك «خلصت يومك» — وبكرة يبدأ من جديد.

كم ياخذ من وقتي كل يوم؟

ربع ساعة تقريبًا، وتنقص كل ما رسخت بطاقاتك أكثر. وربع ساعة كل يوم تسوي أكثر من ثلاث ساعات مرة في الأسبوع.

متى يبدأ «اليوم» في الموقع؟

الساعة ٤ الفجر، مو منتصف الليل. يعني لو راجعت الساعة وحدة بالليل، تنحسب لك على يوم أمس — مثل ما تحسبها أنت بالضبط.

أقدر أغيّر عدد البطاقات الجديدة في اليوم؟

إي، ولكل مقرر لحاله: افتح «إعدادات المقرر» داخل صندوق المقرر في المقررات. الافتراضي ٢٠ بطاقة جديدة يوميًا. انتبه: كل بطاقة جديدة اليوم معناها مراجعات لها في الأيام الجاية، فرفع الرقم يزيد الحمل عليك بعد أسبوع مو اليوم.

وش «راجع أخطاءك»؟

زر يطلع في بطاقة المقرر لما يكون عندك أسئلة غلطت فيها خلال آخر أسبوعين. يمرّك عليها كلها مرة وحدة — بدون ما ينتظر موعدها في الجدول.

مثل المراجعة السريعة، ما يغيّر مواعيد بطاقاتك ولا نسبة تذكرك. مراجعة سويتها الساعة ١٢ بالليل لأنك خايف من سؤال مو دليل إنك حافظه.

أقدر أدخل بدون ما أنتظر رمز التحقق؟

إي. بعد أول دخول برقم جوالك، الموقع يعرض عليك تسوّي لك حساب: اسم مستخدم (أو إيميل) وكلمة مرور. من بعدها تدخل فيهم مباشرة من صفحة الدخول. وتقدر تسوّيه أو تغيّره في أي وقت من حسابي.

نسيت كلمة المرور؟ تحت صفحة الدخول رابط يرسل لك رمز التحقق على واتساب رقمك، وتختار كلمة مرور جديدة. رقم جوالك يبقى هو أصل الحساب — هو اللي يربطك بالملازم اللي اشتريتها.

هل ينفع أستخدمه بدون إنترنت؟

الموقع يفتح بسرعة حتى لو النت ضعيف، وتقدر تضيفه لشاشة جوالك الرئيسية ويشتغل مثل التطبيق. بس إجابة البطاقات تحتاج اتصال عشان تنحفظ.

ليش نسبتي أقل من اللي أحسبها بنفسي؟

لأن الإجابة الصحيحة بالتخمين مو تذكّر. مع أربعة خيارات، اللي ما يعرف شي يطلع معه ٢٥٪ لمجرد إنه ضغط. فالنسبة الخام دايمًا أعلى من الواقع بحوالي أربع نقاط.

الموقع يشيل هذا الفرق ويعرض لك اللي تتذكره فعلًا. رقم أقل، لكنه الرقم اللي ينفع تبني عليه قرار.

وش «مؤشراتك» الثلاثة؟

التذكر: كم تتذكر فعلًا، بعد ما نشيل الإجابات اللي صابت بالحظ. الانتظام: كم يوم راجعت فيه من آخر ثلاثين — نسبة أيام مو عدد بطاقات، لأن أربعين بطاقة يوم الأحد ولا شي بقية الأسبوع هو النمط اللي تعاقبه المراجعة المتباعدة أكثر من أي شي. السرعة: كم ثانية تاخذ على البطاقة، وهل صرت أسرع من الشهر اللي فات.

ما فيه «درجة كفاءة» مركّبة من الثلاثة. الرقم اللي ما أحد يقدر يشرحه ما أحد يثق فيه.

وش «خريطة الملزمة» و«الخطة لين الاختبار» تحت كل مقرر؟

الخريطة تقسم كل وحدة إلى ثلاثة: راسخة (بطاقات بتتذكرها بعد ثلاثة أسابيع حتى لو ما راجعتها)، تتعلمها (شفتها بس لسّه ما ثبتت)، وما شفتها. أقرب رقم عندنا لدرجتك في الاختبار.

والخطة تحوّل تاريخ اختبارك وعدد البطاقات اللي ما شفتها إلى قرار واحد: كم بطاقة جديدة تاخذ كل يوم عشان تخلص الملزمة قبل الاختبار بأسبوع — والأسبوع الأخير للمراجعة، مو لبطاقات جديدة. زر «خلّها كذا» يضبط إيقاعك على طول.

وش المستوى اللي فوق إحصائياتي؟

اسم لمجموع مراجعاتك: مبتدئ من الصفر، وأسطورة عند ثلاثة آلاف، وبينهم ثمانية. الشريط يوريك كم باقي للمستوى الجاي. الأوسمة تعلّم لحظات؛ المستوى هو الطريق بينها.

وش «أفضل وقت لك»؟

الوقت من اليوم اللي تذكرك فيه أعلى — الصباح، الظهر، المساء، أو الليل — محسوب من نفس مراجعاتك. ما يطلع إلا بعد ما يصير عندك مراجعات كافية في وقت معيّن، عشان ما يكون صدفة.

وش الأوسمة اللي في إحصائياتي؟

علامات تاخذها مرة وحدة وتبقى لك: أول مراجعة، مئة مراجعة، أسبوع متواصل، نص ملزمة، وهكذا. واللي ما أخذته بعد يبيّن لك كم باقي عليه.

وش تعني خريطة المربعات؟

كل مربع يوم، وكل ما غمق لونه كل ما راجعت فيه أكثر. والفاضي يوم ما فتحت فيه. الفايدة إنك تشوف انتظامك بعينك — والانتظام هو كل اللعبة هنا.

وش «اختبار تجريبي»؟

أوراق كتبناها لك على شكل الاختبار: لها اسم ومدة ثابتة وأسئلة ثابتة، وتلقاها من زر «اختبار تجريبي» في بطاقة المقرر، في أي وقت وبدون علاقة بتاريخ اختبارك. وبعد ما تسلّم تشوف الورقة كاملة مع الشرح.

وإذا فتحته ولقيت «ما فيه اختبار تجريبي لهذا المقرر بعد»، فمعناها إنه لسّه ما انكتب له اختبار — وأول ما ينكتب يبان لك في نفس الصفحة.

الاختبار التجريبي ما يغيّر مواعيد بطاقاتك ولا نسبة تذكرك.

ليش الاختبار التجريبي ما يعطيني الإجابة على طول؟

لأن الاختبار الحقيقي ما بيعطيك. قيمة البروفة إنها تشبه الشي اللي تتمرّن عليه — تحت ضغط الوقت وبدون ما تعرف وش صار فيك. وأول ما تسلّم تجيك النتيجة كاملة مع كل الإجابات والشروح.

الوقت محسوب عند الخادم، فلو سكّرت الصفحة أو رجعت بعدين، الورقة تنحسب بنفس المدة.

وش يتغيّر إذا حطيت تاريخ الاختبار؟

شيئين، كل واحد يجيك في وقته:

آخر ٧ أيام — يرفع الموقع هدف التذكر من ٩٠٪ إلى ٩٥٪، يعني مراجعات أكثر للمادة المهزوزة عندك.
آخر ٣ أيام — تظهر مراجعة سريعة: مرور واحد على كل بطاقات المقرر.

أما الاختبار التجريبي فمتاح في أي وقت، حتى لو ما حطيت تاريخ.

ليش المراجعة السريعة ما تغيّر إحصائياتي؟

عشان ما تكذب عليك. المراجعة السريعة تمرّ على كل البطاقات في يوم واحد، وطبيعي تجاوب أغلبها صح لأنك للتو شفتها — هذا مو دليل إنك حافظها بعد أسبوعين.

فهي مفيدة كتسخين قبل الاختبار، لكن ما تُحسب في نسبة التذكر ولا تغيّر مواعيد البطاقات.

ليش فيه مقررات مقفلة؟

لأن أسئلتها من الملزمة نفسها. تشتري الملزمة من المتجر وبعدها تفتح المقرر هنا برقم الطلب اللي وصلك من المتجر.

اشتريت وما انفتح لي — وش أسوي؟

كلّمنا ومعك رقم الطلب ونفتحه لك يدويًا.

لقيت سؤال غلط أو صياغته ملخبطة؟

كلّمنا عنه. الأسئلة تنصلّح وأنت تستخدم الموقع، وتصليح السؤال ما يضيّع تقدمك فيه — جدولتك تبقى مثل ما هي، بس صياغة السؤال تتغيّر.

وكمان الموقع نفسه يراقب أسئلته كل ليلة: أي سؤال نسبة الخطأ فيه غريبة ينرفع لنا عشان نراجعه.

لو أضفت الموقع لشاشتك الرئيسية، التذكير يجي من المتصفح — ما عاد فيه تيليجرام.

خريطة الموقع